RESEAUX CULTURELS SOUBOU GEORGES.

Bibas, nèfles nana po gouté.

Bibas. Isi nou apèlsa bibas dann dot péi na dot non, (konm nèlfe) sé in fri dann nout péi, lé pa oubliyé, mé malérèzman kan lé la sézon lé asé sèr. San trèman bann fri i gat bonpé, épila li lé asé frazil. Dann léo, dann la foré lé an pagay é lé pa trété, si ou vé manzé konm i di sat lé bio, fo mont vréman dann léo ousa domoun la pa ankor tro kolonizé. An pèyod fin livèr dann nout péi dann léo po sat i koné na sat lé pa gaté, lé sirman akoz i fé fré, bann ti bébèt Larénion, i dwa pa inm lofré. Sé in fri lé asé sikré fo manzé kan lé mir sinon lé èg.

Bann zantropriz Larénion , fabrik larak la biyn konpri son litilité po fé bann pons, tout fason la i agard pa si lé gaté. Antouléka sé in fri, mi diré ké bann plantèr i devré fé in zès é plant ali. Sirtou nou vé pa sak lé rézistan ké bann sèrsèr la modifiyé , konm i di i fabrik in kalité i rézis a bann zinsèk, mé ké po nout kor lé pa bon. Granmoun i si sak lé pli ti lé pli dou. Sa i pé fé osi konfitir, sé inpé konm gouyaviyé na plin.

Bibas mûres - si lé pa silfaté nana lasans ké lé gaté inbonpé, sof si ou sava rod sa dann léo laba landrwa i fé fré..