RESEAUX SOUBOU GEORGES.

Inntipé lékolozi po nout péi.

Lékolozi lé in nafèr tout domoun i dwa prann konsyans. Sé pa in késtyon fo lé zot i di anou de fèr. sé in devoir ke nou dwa fé po nout péi é osi po la planèt, la plipar la fine komanss prann konsyans de sa. Mé dann touléka sé la sosiyété li minm i sali la planèt, Isi domoun andéor i wa na bonpé la salté, mé ousa zot i sort lé pir, sanm bann problinm polisyon kiswa lér ou minm la natir! Bon fodré biyn dir la planèt li minm lé antrinn malfini. Déstriksyon masif bann foré! konstriksyon bann grogro zizine, modifikasyon zénétik kiswa bann plant zanimo tousala, é biyn dot soz po dérègl la planèt. Sé touzour lo bann pli gro striktir lé anplass i poli nout natir. Nou lé dann in sosiyété ousa tout i poli. La di lo plastik la pa bon, mé arla! tout bann zaliman lé anbalé sanm plastik, bann zwé lé inporté lé fé sanm sa, la plipar bann zaparèy éléktroménazé, bann loto é biyn dot soz. Pa silontan sa la fé la piblisité po bann sak plastik ké té danzéré, sé in bon nafèr. Mé la ranplass par inn lé swadizan biodégradab, mé tansyon pangar i tardrapa po dir ké lété in fo nafèr fodra sanzé.

Antouléka la plipar lotan kan nou sava dann komèrs sou rantr touzour lakaz sanm in takon sak plastik anbalaz bonbon, laviann brèd, fromaz. Dann so trikmardaz sé touzour bann maléré i pèy konsékans po lo bann trèman so bann désé. Ogmantasyon bann sarz po trètman. I pé pa fé otrman de tout fason, komèrs wa kontiniyé inporté i pé pa fèr otreman. Pa tro lontan desa mwin la vi in roportaz si bann lagon lé poliyé dann sèrtin zégou i débouss dann la mèr, Sé sèrtinnman pa bann domoun i abit dann léo i fé sa, o GOL dann la komine Sin-Lwi té dann in tan liziné té fé sa, Sin-Pir pa trolwin santr vil na ankor zégou i débark dann lagon, dawar i déranz pa tro bann domoun na zot kaz zis si lo bor la mèr. Lékolozi i pass osi par la boté nout bann péizaz , konm i di la plipar lotan domoune i gard plito la tèr la mèr, mé na in nafèr osi i devré rogardé sé sak i dé figir vréman lo péizaz, bann zantinn radyo télé é sirtou bann rolé GSM. Tou lé 200 mètr é si kaziman tout bann zimèb é dann la kour bann domoun na inn, so bann bout féray i raport larzan a bann propriétèr, bann fournisèr, bann zazanss imobiliyé, sa sé in polisyon vizibl ké tout domoune i fèrm lo ziyé dési. Bann zétid i di ké sa la pa bon po domoun é i donn maladi.

Isi lé pa konm lé zot zandraw konm i di sé in spésifisité, riyn lé réspèkté, minm pa la distans obligatwar bann zantèn rolé par rapor bann zékole, po sa fo nir inpé koté Laravine Dékabrir, é osi dann in takon zandrwa dann nout péi. So bann zantinn la la plipar lotan lé touziz a pinn 1 mèt odési sèrtin batimansosyal. Konm mi di si sa i donn maladi, bann zotorité anplass i dévré fé in zès ( sa i rik pa arivé vi ké zot i giny larzan anndan). Si na po di na inta dsoz, mé krwa a mwin sé pa lo déti salté nou wa tréné si lo bor somin wa tiyé a nou, mé sat nou ansèrv é i fé zoli wa fini sanm nou. Vivre pleinement toute nôtre culture dans l' Océan Indien. Soubou réseau.

Ansanm anon bouzé po nout péi..