RESEAUX CULTURELS SOUBOU GEORGES.

Naissance de l'Île. Hoareau - I.

Naissance de l'île. Lavé in coup, lavé in l'océan gran-gran mèm, tou-ni mèm. Ou té pé envoye lo zié dan' tout' direction, zamé ou té y bite si in pti guiguine la tèr. Tou lé zour, soleil té y fait lo tour l'océan-la. A fors tan voyazé, lo boug-la té cuit par d'si cuit, parce que zamé li té y tonb' si in bel cap pou ropose in grin son pié. Dopi gran-tèr l'Ostrali zisqu'a continent l'Afrik, la mer té y roule son band' vag san arété. Li té si lo bor rend' l'ame Bon Dié, si tèlment té i manque ali in pti plaz pou dégrène in instan son band' vag. En d'sou la mer, la tèr té y margrongne bien souvendéfois, acause que li aussi li nauré té bien aise respire in grin la brise enbomé ec bon l'odère y sorte pays dehor. Lo vent, tank ali, li té y coné pi quoça fait d'son cadav, si telment li lavé mar zoué 'senb' la crète band' vag la mer, épiça çaroye band' niaz çarzé la plie, dopi bord'mer zisqu'a loin-loin mèm. In zour band' compère-la la réni in coup pou mèt' asouplaingne zot malhéré sor ensenb.

La tèr que lavé passe sais pa conbien d'ten dan son trou, en fongognant son tète sans aret, la senti tou d'in coup in l'ide traverse son coco. -" Ma domand' do Fé, mon dalon qu'y dort dossou mon piè-la, souf in coup, gonf in coup, gonf-gonf mèm ziskatan li va niabou soulève amoin pardsi do l'eau, Alor… " -" Oui, oui, oui ! la di tout' en kèr en coupant la parole zot conpèr. Ça in l'idé gadiam' ! " Ca-mèm l'arrivé pou vrément, in pé pli tar. Do Fé que té i dort dopi si telment lonten, la reveille in coup, épiça la comence bouloté. La mer la gargouille com in gran bouillon brèd. La tèr la mèt a trenblé, la félé parkenpark. Epi, sous la force in poussé çaud com do fé, la tèr la soulevé ; son corp la tortillé com in flèr zété si la brèz. In gran l'étan-a-lav rouz en flam do fé la entoure ali. Alor ? dan' vent' la mer ? la sorte la tète in l'île, in bel montagne, haut mèm, trenblant com in feil sensitv, in pe hontèse dovan soleil, que lil lavé aperci rien qu' l'onbraz zisqu'acetèr. Lété bardzour. Pou promié fois, rayon Messié Soleil la caresse lo flan encor tiède lo zène mamzèle. La mer la lice, com y lice in doi gomé do miel, lo band' renpar noir couvert la fimé. Epi, lo vent-zalizé, étoné, aprè z'avoir soulève lo voil lo zène fille la aroze son band'sillon adouci ensenb'dé-trois niaz bien fré. Tout' la zourné, com' in band' marmail la gaingne zouzoute zour d'l'an, soleil la zoué lou caciète " senb " la montagne. La mer la taille ène-dé plaz la sab doré d'arzent pou dépose son l'enfilaz de lame. Epi la tèr la soupire in gran kou, lo kér gonflé d'bien-aise. Solment lo pti fille laté domi tou-ni. Alor la mer la transporte in voyaz coco do l'eau que la cale si la plaz épi la mèt' a zermé. Lo vent la ramasse in tonaz lo grain dan' pays l'Afrik, l'Ostrali, dans l'Ind', en Cine, insidsuite, épila la rovni sémé, aidé par la farine la plie tiède que la arose tou d'suite lo somence. Soleil la réçaufe tou ça-la encor… Alor lo pti l'île la mèt a viv ; li la abille son corps ec fouzér épi pié d'bois. Lo tenp la passé.

In zour, in torti que lavé perd' cemin, la bite si lo morço la tèr, que lil la trouv bien gaillar. Li la fait son nid la mèm, épiça, partou ou-ça li la voyazé aprè, li la annonce que lo pti pays té y éxis. Cad-la té y fini pi pète en flèr, bouqué par dsi bouqué tout' enbomé, falé voir ! Lo fri té i mire dan' soleil coulère l'or fin, épi té y çape atèr pou ardone d'aut pié d'bois, d'aut flèr. Do loin mèm, atiré par l'odère l'essence transporté dan çak souf la brise, band' zoizo la vni fait zot nid. Lo tenp la continié passé. In an… in sièc… ziskatan, in zour, in gran voil blan si la mer, la aperci, loin-loin mèm, lo courone niaz, si la tète lo pti morço la tèr. Alor, pou promié fois dopi son l'existence, in hom la mèt' lo pié si lo sol couvert la mous'. Conte : Hoarau I. : " Naissance de l'île "

Vivre pleinement toute nôtre culture - Textes auteurs - écritures originales. Po linstan lo lékritir rénioné lé bazé si lo fonétik.