Kamaléon, zéko...Arla inn ti zanimo i fé parti nout kiltir, ou dimwin la kiltir marmay lontan. Si bann défansèr la natir la té navé ankor souvnans kosa bann marmay lontan é min koméla té fé ansanm zot té noré ras zot sové. Dann tan lontan navé pwin tro lo zé modèrn, mé marmay navé inpé lo vis dann latèt, té invant in takon,lo zé larou, lamizik si fèrblan é biyinsir in takon dot soz. Lo zé té fé sanm in takon zafèr : pétar amaré si la ké losiyn, krapo, kamaléon. A koté si limaz ni wa inn ti kamaléon (caméléon). Lontan bann marmay té kol sa sanm inn la (ti laso fé ansanm lo kèr kann). Po pa anrazé nou wa apèl sa bann zé ékolozik, vik navé pwin linportasyon plastik i sort sépa ousa.
Po an ronir si nout listwar kamaléon, bann marmay konm sèrtin bann gramoun navé in pé pèr so ti zanimo, parsk li mord asé for. Po sèrtin marmay té i iynm biyn zwé ansanm défwa sanm la pèr lé lafolman lo kamaléon té risk grim si zot zanm é rant dann zot kilot, é mord azot. Sé in nafèr té ariv souvan dann so tan la, sèrtin té fé mord zot zwazo. Konm dann tout péi, na touzor bann zistwar i tourn otour so bann zanimo la. Po akozé si la malis bann marmay té fé sanm so bann zanimo la dann nout péi na pi, é minm si na ankor inndé i ésèy, sé in nafèr lé pini par la lwa. Epi nou viv dann in lépok i pé pa fèr ninport kwé, é sa mi pans ké bann domoun la biyn konpri.
Ansanm anon protèz la natir nout péi.
Réseaux SOUBOU GEORGES Ile de la Réunion tous droits réservés rézo 100% Larényon