RESEAUX CULTURELS SOUBOU GEORGES.

Planète Ile de la Réunion. Kozman na rapor sanm lo mo la lang.

Kozman domoun, bann kozman an sik siro domyèl, bann kozman i fé mal, kozman foutan sa i fé parti la kiltir. Atèrla nou wa donn azot inndé sinifikasyon, dimwin sak i pé. Proverbes, ridimes et sirandanes de la Réunion, les expressions plus ou moins courantes

La lang na pwin lo zo! La lan i bat konm la ké lo syin!

Kosa i vé dir? La lan na pwin lozo sé kan in moun i koz po ryin dir, Li yinm fé koméraz son lang i yinm baté. La lang dann lo kor imin na in gran linportans, kiswa dann ninportakèl péi, dann ninportakèk sitiasyon. So ti bout la dann nout kor na in gran pouvwar, fé lo byin konm lo mal, li pé fé kondane, in moun po in fot li la fé, ou fé ansort kin koupabl i ansort ali. La lang i pé blès in moun pliskin kouto, ou in koud fizi.

Li na in gran lang - Son lang lé gran! El na gran lang! Fézèr la lang!.

Apré la lang na pwin lo zo, i pé dir osi li na in gran lang, -- konm zot i koné an kréol i ansèrv bonpé lo mo maskilin po dézine osi in madam -- Sé in moun i yinm fé koméraz konm i di, li asté po vann, li pas kaz an kaz po ékouté, apréla li sava fé ladi lafé. Ladi lafé souvan i di sé bann fanm i fé sa! mé lo zonm osi kan zot i mèt azot, arlorla i nir in vré katastrof. Li na gran lang li sava fé koméraz, po fé kok son kamarad. Gan lang sé kan in moun i sava rakont zafèr lé mantèr po fé batay son kamarad.

Son lan i grat!

Té moun la la lang i grat, na lontan li pokor fé son koméraz, la tout lé byin son lang i grat po fé in komansman. Langèz sé in moun i yinm osi fé son koméraz.

Langkozé!

Koz an kréol, in moun i koz sanm ou dann son lang. Gayar manyèr kozé koz an rénioné, langaz momon papa. Boug la i koz langaz, domoun i konpan pali, li koz langaz lo mor, li sava war mové zam. Mon lang lé gayar i giny di bonpé zafèr anndan. Li vé pa son zanfan i koz la lang rénioné, mé li minm li koné pa kozé fransé, si ou giny pa koz fransé ou in not lang é ou défann lo moun kozé so lang la! la na in problin si li aprann koz fransé é li koz sanm ou ou konpran pa ali!

Lang rénioné la!

Lang rénioné la lé konm lo Maloya, avan té intèrdi koméla lé rokoni, konm in litilité. Mé na ankor domoun lé kont so nafèr la pokosa? Si nou gard byin sé bann moun i tiliz plisouvandéfwa la lang sanm lamizik po zot profi, politik sinon po fé rant larzan, kan i raport azot, i bouz pa. Mé lo problinm sé ké si zot té ékri azot fason la pétèt té noré té dakor, mé wala! zot bann ti kamarad la pas dovan zot la prann lo nafèr po zot. Astèr i batay po in K ou in C, bon! mwin mi lès azot dann zot caca, é mi tiliz mon K. Sak la pa kontan oubli pa ké na dot sit kolonyalis i itiliz dot maynèr ékri. Nout lang sé po lisntan in lang na pwin vréman in grafi, asé pousé, po linstan lé plito fonolozik. anfin na domoun i travay si in not manyèr ékri, mi pé ankouraz azot.