LEKSIK BANN MO AN RENIONE -

LET K - LETTRE K.

Kabar.

Aswar nana kabar, di kisa lé la Kabar sé la fèt dann nout péi. Lo vré kabar minm napi. Lo kabar lé sitèlman politizé, ké nou poz anou lo kèstyon minm si sé ankor kabar.

Kalbas.

Kalbas i ansèrv po fé bob ansanm, mé i di osi in mon no pwin aryin dann son kalbas. Zéro kalbas la fimé granbwa.

Kalbanon.

Ti kaz dann kora kann ou sinon sa dann la foré. Kalbanon banbou.

Kann.

Kan lé dou, kann tamarin, kann mapou lé dou. Alon manz in bout kann.

Kité.

Astèr mi sar kit so trin la kouyonis. Kit in moun pars tout i va mal, kit son travay, kit son mari, kit son fanm, kan fo kité fo kité.

Konésans.

Boug la na la konésans, sitèlman intélizan. Pa pars ou la ariv lwin dann lékol, ké ou tousèl na la konésans. Minm inn pli koyon ké ou na konésans. Mi koz an konésans de koz, mwin la vi ali vol domoun. Li na sitèlman la konésans ké in boulon li koné pa dévisé. La li fé lékol é li kraw tou swar. I di awar tro konésans i pé rann fou. Boug la lavé in ta konésans li la ni fou avèk.

Kozé.

Kozé, koz, koz son lang. Té fransé i koné pa mé i ésèy kanminm. Olyé koz fransé makot, koz out kozé. Li giny pa koz fransé arla li koz an makot, li po fé ont ali. Gayar manyèr kozé. Larényon li la ont koz kréol, mé laba dann péi lafré son kozé i mank ali.

Konpasyon.

Kisa na ankor la konpasyon?

Kosto.

nana sak lé kosto, é na sak lé gra. De tout fason fo pa mélanzé.

Kostar.

La li lé an kostar, sirman li na in randévou galan. Kostimé kravaté li lé an kostar, sépa si li la pran in bin avan. An kostar mé la pat lé krouté.

Komisyon.

Oubli pa anminn mo komisyon, Aminm son komisyon si ou dwa ali.

Kolkol.

Sé lo piyé gérivit, zèrb Sin-Pol. A par po géri domoun, so mo la i vé dir osi ké in moun lé anpestan, li inpoz son prézans, li déranz.

Kouyonis.

Grenèl lakouyonis, la kouyonis sé in maladi i géri pa, na pwin romèd po sa. Kan in moun lé abityé sanm la kouyonis lé sir na pwin médsin i pé sony ali. Ski vé byin dir kan in moun lé abityé konmsa, kosa ou vé fé?

Kwi.

Arla in mo lé intérésan, kwi : ski vé dir an fransé cuit, mé an rénioné so mo la na plizèr sinifikasyon. Fé kwi manzé, lo boug lé kwi sé a dir li lé fatigé li lé kwi. Boug la i travay po kwi -po in bousé manzé- li travay po ryin, li anbos domoun konm kwi, li anprofit desi domoun. Li fé travay konm kwi.

Karli.

Bondyé malbar.

Kas kolé.

BLi la tonbé li la kas son kolé. La i kas minm kolé po rogard bann ti manzel, té bann kafrine i fé kas kolé bann ga. Lo zomn i kas kolé po fanm. A twé afors ramas mantèr ma kas ton kolé. La i kas minm kolé la!

Planète culturelle Île de la Réunion - Patrimoine culturel Île de la Réunion.